Gott upplýsingaflæði og móðurmálskennsla í grunnskólum

Það er af mörgu að taka þegar ákveða skal hvaða verkefni skulu ganga fyrir í málefnum innflytjenda.  Í þjóðfélaginu heyrast margar raddir og fjölmargir hafa skoðun á þessum mikilvæga málaflokki.  En þarna er um stór verkefni að ræða, sem allir geta tekið þátt í að vinna að.  Mikilvægustu verkefnin eru þó, að koma á góðu upplýsingaflæði til innflytjenda,  tungumálakennslu fyrir fullorðna á vinnustöðum í vinnutíma, móðurmálskennslu í grunnskólum, sem og að móta skýra stefnu varðandi  viðurkenningu á námi innflytjenda.  Það að viðurkenna nám innflytjenda, er nauðsynlegt til þess að sá mann- og menntaauður sem í innflytjendum býr, nýtist íslensku samfélagi.  Góð undirstaða í eigin móðurmáli, auðveldar málfar og skilning þeirra á íslenskri tungu.  Börn sem koma til landsins á leikskólaaldri og hafa góðan orðaforða og sterka undirstöðu í sínu eigin móðurmáli, eiga oftast auðveldara með að læra nýtt tungumál. Með því að bjóða grunnskólanemum af erlendum uppruna móðurmálskennslu, hjálpum við þeim að ná góðum tökum á íslenskri tungu, styrkjum möguleka þeirra á skýrum og góðum samskiptum við aðra einstaklinga í íslensku samfélagi og gerum þeim kleift að stunda framhaldsnám.  Það kemst enginn innflytjandi langt ef hann hefur ekki íslenska tungu á valdi sínu.  En með góðri íslensku kunnáttu taka þeir að fullu þátt í samfélaginu og leggja sitt af mörkum til uppbyggingar og þróunar.    

 

Athugasemdir

[Vilborg G. Hansen, 4.2.2007 kl. 23:53]

Já þetta helst allt í hendur.  Það þarf að taka almennilega á móti innflytjendum, kenna þeim tungumálið og skýra fyrir þeim leikreglurnar í okkar samfélagi svo þeir geti tekið þátt og lagt sitt af mörkum s.s. verið virkið í samfélaginu.  Þannig líður öllum vel og öllum gengur vel.  Annað stórt og mikilvægt atriði er að menntafólk sem hingað flytur fái menntun sína viðurkennda.  Það er náttulega ömurlegt að ætla skurðlækni það að vinna í verslun bara af því að hann fær ekki menntun sína viðurkennda hér.  Hef reyndar aldrei skilið það ..... mundum við Íslendingar sætta okkur við það þegar við flytjum til annarra landa? Held ekki.